Kur njerëzit tradhëtojnë në çdo aspekt, ata ulin veten e tyre. Kohët e fundit është bërë mjaft e zakonshme tradhëtia në marrëdhënie. John Hoëard, një psikoterapist, thotë se në 50% të marrëdhënieve, ekziston tradhëtia. Shpesh ajo mbetet një arsye e fortë e divorceve, ndaj dhe mendohet se shumë çifte po ndahen kohët e fundit.
Por cilat janë arsyet se pse personat tradhëtojnë? Shumë shkencëtarë socialë dhe shumë psikologë besojnë se është pikërisht monogamia ajo që shihet si një kufizim nga shumica e njerëzve. Ata thonë se kryesisht meshkujt, të cilët priren më tepër të tradhëtojnë, e shohin si jonormale monogaminë, pra lidhjen me një person të vetëm për gjithë jetën. Sipas të dhënave edhe nga evolucioni i njeriut, meshkujt për të siguruar vazhdimësinë e llojit, shkonin me më shumë se një femër përgjatë jetës së tyre. Por krahas një arsyeje të tillë, ekzistojnë edhe arsye të tjera, të cilat psikologët i rendisin si më poshtë:
Mungesa e dashurisë
Edhe pse mund të shihet si një justifikim, një numër i madh tradhëtarësh shprehen se kanë tradhëtuar, ngaqë nuk e donin më personin që kishin në krahë. Gjithashtu, edhe faktorë të tjerë si mërzitja, mungesa e komunikimit, mungesa e tërheqjes për personin tjetër, mund të luajnë rol në këtë arsye.
Premtim i kotë
Shumë njerëz premtojnë se në një marrëdhënie do të jenë besnikë sa për sy e faqe dhe përfundojnë duke tradhëtuar. Ka edhe të tjerë që betohen përpara institucioneve të kultit dhe i shkelin ato betime, të cilat ia bëjnë personit tjetër. Persona të tillë që betohen apo premtojnë gjëra të kota, janë më të prirur të tradhëtojnë në një marrëdhënie.
Problemet me vetëbesimin
Shumë të rinj kanë probleme me vetëbesimin dhe mendojnë se do i kalojnë këto probleme duke pasur sa më shumë lidhje në të njëjtën kohë. Kjo gjë u duket shumë në modë dhe e praktikojnë për të rënë në sy, pasi qendra e vëmendjes në shoqëri u shton atyre vetëbesimin.
Faktorë të lidhur me situata të caktuara
Ekzistojnë situata të caktuara që kanë të bëjnë me vendin e gabuar dhe kohën e gabuar, në të cilat bëhen gjërat e gabuara. Alkooli dhe droga akuzohen si faktorët kryesorë që turbullojnë përqëndrimin e njerëzve dhe i shtyjnë drejt tradhëtisë, pa qenë të vetëdijshëm.
Shpesh tradhëtohet pa e marrë parasysh se çfarë i shkakton personit që të do. Viktimat e tradhëtisë rrezikojnë më shumë të bien pre e ankthit dhe depresionit, shkruan bota.al. Ata janë më të prirur të reduktojnë edhe marrjet e ushqimit, si dhe të bien pre e konsumimit të drogës apo alkoolit, si pasojë e tradhëtisë që kanë mbi supe prej personit që donin.
