Konsumimi më i lartë i ushqimeve të përpunuara si pijet e gazuara, buka e paketuar dhe shumica e drithërave të mëngjesit, mund të lidhet me një rrezik në rritje të zhvillimit dhe vdekjes nga kanceri, ka treguar një studim i ri. Sipas studimit nga Shkolla Imperial e Shëndetit Publik me bazë në Mbretërinë e Bashkuar, studiuesit zbuluan se konsumi më i lartë i ushqimeve të përpunuara shoqërohej me një rrezik më të madh të zhvillimit të kancerit në përgjithësi, veçanërisht me kancerin e vezoreve dhe të trurit.
Ai u shoqërua gjithashtu me një rrezik të shtuar të vdekjes nga kanceri, veçanërisht kanceri i vezoreve dhe i gjirit. Studimi thotë se çdo 10 për qind rritje e ushqimit të përpunuar në dietën e një personi ka rezultuar në një rritje prej 2 për qind të kancerit në përgjithësi dhe një rritje prej 19 për qind në kancerin e vezoreve.
Nëse jeni të fiksuar pas ushqimeve të paketuara duhet të njiheni edhe me rrezikun e tyre!
Për më tepër, çdo rritje prej 10 për qind në konsumin e ushqimeve ultra të përpunuara u shoqërua me një rritje prej 6 për qind të vdekshmërisë nga kanceri në përgjithësi, si dhe me një rritje prej 16 për qind të kancerit të gjirit dhe një rritje prej 30 për qind të kancerit të vezoreve. Dr. Eszter Vamos, autori kryesor i studimit, nga Shkolla e Shëndetit Publik tha:
Ky studim i shton provave në rritje se ushqimet ultra të përpunuara ka të ngjarë të ndikojnë negativisht në shëndetin tonë duke përfshirë rrezikun tonë për kancer. Duke pasur parasysh nivelet e larta të konsumit në të rriturit dhe fëmijët në Mbretërinë e Bashkuar, kjo ka implikime të rëndësishme për rezultatet e ardhshme shëndetësore.
Studiuesit zbuluan gjithashtu se konsumi më i lartë i ushqimeve ultra të përpunuara ishte i lidhur me një rrezik në rritje të zhvillimit të obezitetit dhe diabetit të tipit 2 tek të rriturit në Mbretërinë e Bashkuar, si dhe një shtim më i madh në peshë tek fëmijët në Mbretërinë e Bashkuar nga fëmijëria në moshë madhore. Dr Kiara Chang, autorja e parë për studimin, nga Shkolla e Shëndetit Publik tha:
Personi mesatar në Mbretërinë e Bashkuar konsumon më shumë se gjysmën e marrjes ditore të energjisë nga ushqimet ultra të përpunuara. Kjo është jashtëzakonisht e lartë dhe shqetësuese pasi ushqimet ultra të përpunuara prodhohen me përbërës me prejardhje industriale dhe shpesh përdorin kimikate ushqimore për të rregulluar ngjyrën, shijen dhe qëndrueshmërinë e produktit.
OBSH dhe Organizata e Kombeve të Bashkuara për Ushqimin dhe Bujqësinë kanë rekomanduar më parë kufizimin e ushqimeve ultra të përpunuara si pjesë e një diete të shëndetshme të qëndrueshme, thuhet në studim.
