Elodie duket se ka vendosur të mos e mbajë më larg vëmendjes jetën e saj private. Një postim i fundit në rrjetet sociale ka nxitur reagime të shumta nga ndjekësit, të cilët e kanë interpretuar si konfirmim të lidhjes së saj me balerinën shqiptare Françeska Nuredini.
Gjatë pushimeve në Japoni, këngëtarja publikoi disa momente nga udhëtimi i saj, por ajo që mori më shumë vëmendje ishte një fotografi intime ku ajo dhe Françeska shfaqen duke u puthur dhe përqafuar pranë njëra-tjetrës.
Edhe pse prej muajsh në media dhe rrjete sociale kanë qarkulluar imazhe të dyshes bashkë, kjo është hera e parë që vetë Elodie ndan publikisht një moment kaq personal. Për shumë fansa, ky veprim shihet si zyrtarizim i marrëdhënies së tyre.
Dyshja është parë shpesh së bashku muajt e fundit, në destinacione të ndryshme si Venecia dhe Ibiza.
Udhëtimi në Japoni duket të ketë qenë veçanërisht domethënës, pasi ato kanë ndarë përvoja tradicionale si ceremonia e çajit dhe vizitat në tempuj historikë.
Lidhja mes tyre nisi në ambientin profesional. Françeska Nuredini, 24 vjeçe, është pjesë e trupës së baletit që shoqëron Elodien në koncertet dhe turnetë e saj muzikore.
Në një intervistë të mëparshme për “Le Mile Magazine”, Françeska e kishte cilësuar bashkëpunimin me këngëtaren si një përvojë shumë të rëndësishme, si në aspektin artistik ashtu edhe në atë personal, një deklaratë që pas zhvillimeve të fundit merr tjetër kuptim.
