Aktori dhe autori i mirënjohur shqiptar, Çun Lajçi, ka kaluar një nga betejat më të vështira me Covid-19. Ai është infektuar dy herë me virusin e rrezikshëm, që po e mban peng prej gati 5 muajsh. Në një intervistë të dhënë ditën e sotme për emisionin “Ftesë në 5” përballë Bieta Sulos, Lajçi u shpreh se disa nga simptomat e sëmundjes së tij ishin ethe, temperaturë 40 dhe niveli i oksigjenit i ka shkuar deri në 50%.
Aktori u shpreh se këto simptoma e kanë shoqëruar gjatë shumë netëve, kur siç ai e përshkroi mendonte edhe vdekjen. Ndër të tjera ai tha se nëse do të ndahej nga jeta pengu i tij më i madh do të mbetej fakti që s’ka mundur të vizitojë varrin e vajzës së ndjerë, Bubulinës, prej 5 muajsh.
“Jam mësuar të shkoj së paku 2 herë në javë atje. Sepse kur e varrosa e kisha të vetmin motivacion që të jetë afër Bjeshkëve të cilat qeveria e Ramush Haradinaj ia fali Malit të Zi”, tha ndër të tjera mes lotësh aktori.
Vajza e vetme e Çun Lajçit, ka humbur jetën rreth 4 vite më parë.
