Më pak se dy javë na ndajnë nga 14 shkurti dhe këtë herë nuk do të flasim për surprizat që keni planifikuar për partnerët. Në ditën e dashurisë, këngëtarët shqiptarë kanë vendosur që të bëjnë dhuratat më të bukura për fansat e tyre.
Capital T është kujdesur që të sjellë gjithë atmosferën romantike të mundshme në këngën e re që pritet të publikohet në 14 shkurt. Reperi ka udhëtuar drejt Parisit, për të realizuar klipin e radhës. “Gjeje titullin”, ka shkruar ai poshtë fotos bardh e zi, për të nxitur kështu edhe më shumë kurreshtjen e fansave.
Në postimin e fundit, Mozzik shihet në një skenë plot me lule të kuqe, që do të jetë pjesë e projektit i cili pritet të publikohet ditën e Shën Valentinit. Këngëtari ka shkruar se diçka e madhe po vjen, duke u kujdesur që pas hiteve “Dhelpër dinake” dhe “Edhe ti”, të mos i lërë ndjekësit pa një surprizë në muajin e dashurisë.
Niki Delijorgji dhe Alban Ramosaj bënë shumë zhurmë në rrjet, kur vendosën që këngën e tyre të parë sëbashku ta lajmëronin në një mënyrë të veçantë. Nëpërmjet një strategjie argëtuese në Instagram, ata i shtynë ndjekësit të mendonin se Niki ishte shtatzënë, për të shpjeguar më pas se e gjithë kjo simbolizonte ‘lindjen’ e një projekti të përbashkët. Një punë me kaq dashuri, Niki dhe Albani kanë vendosur ta publikojnë me 14 shkurt.
Kështu, ditën e Shën Valentinit dhuratat i presim edhe nga emrat e njohur të showbizit. Një zgjedhje e veçantë, apo jo?