Pak ditë më parë përfundoi në pranga e policisë, Alban Dyrmishi, i cili për publikun shqiptar është bërë i njohur në emisionin “Për’puthen”. Arrestimi i tij u bë pasi në qendrën e tij të masazhit, ushtrohej prostitucion.
Policia zbuloi se Albani është vendosur në pranga për veprat penale “Shfrytëzimi i prostitucionit” dhe “Mbajtja e lokaleve për prostitucion”.
“Ky shtetas, pasi kishte marrë një ambient me qira, në rrugën ‘Sami Frashëri’, e kishte përshtatur si qendër masazhesh ku kishte të punësuara dy shtetase, dhe përveç aktivitetit të regjistruar ligjërisht, ushtronin dhe aktivitetin e kundërligjshëm të prostitucionit”, shkruhej në deklaratën e policisë.
Megjithatë, Dyrmishi është liruar nga qelia dhe tashmë gjendet në masën “Arrest shtëpie”. Ai ka postuar në “Instastory” bisedat ku tregon konfliktin me të cilin është ndeshur me pronaren e shtëpisë që kishte marrë me qira.
Në bisedat e publikuara pronarja i kërkonte Alban Dyrmishit të mos e shqetësonte më, ndërkohë që ky i fundit këmbëngulte për të folur duke i kërkuar llogari për arrestin, e duke agravuar në ofendime dhe akuza.
