Pesë ditë më parë, Hygerta Sako humbi të atin. “Na la zemërthyer e shpirtcopëtuar, por iku nga kjo botë si bashkëshort, baba e gjysh i gëzuar,” shkroi ajo në Instagram. Çfarë ia ka vështirësuar akoma më shumë dhimbjen është fakti që nuk mund të qëndrojë pranë familjarëve, për shkak të situatës së shkaktuar nga koronavirusi.
Në Instagram, Hygerta shkruan:
“Dashuria në kohërat e kolerës a.k.a dhimbja në kohërat e koroavirusit! Thonë dhe kanë të drejtë që dhimbja kalohet me njerëz. E humba babanë në një moment kritik për jetën dhe vazhdimësinë e të gjithëve ne. Mbyllur në shtëpi me nënën dhe vajzën time, dhimbja është akoma më e madhe.”
Më tej shton:
“E kam të pamundur t’ju kthej përgjigje të gjithëve, gishtat nuk më punojnë e mendja është e turbullt. Por ju jam mirënjohëse pafund për të gjithë mbështetjen pa kufi që më keni dhënë në këto ditë të vështira. Kush ka humbur babain, ma kupton shumë mirë dhimbjen. U prehshin në paqe të gjithë baballarët tanë, që na kanë rritur me sakrifica e vetëmohim e na kanë mbushur me dashuri e përkujdesje. Një këshillë për të gjithë ju që e gëzoni ende dashurinë dhe zërin e babait: Gëzoni sa më shumë me ta, bisedoni, puthini, përqafojini, sepse nuk e dimë kurrë kur do i humbim dhe çdo sekondë më shumë me ta ka vlerë të paimagjinueshme. Zoti ju bekoftë të gjithëve e faleminderit dhe një herë për të gjithë mesazhet e mbështetjen që më keni dhënë.”
Ngushëllime familjes!
