"TË MIRËSJELLSHMIT"/ Muzikal për fëmijë tek Teatri Metropol - AlpeGossip
“TË MIRËSJELLSHMIT”/ Muzikal për fëmijë tek Teatri Metropol

“TË MIRËSJELLSHMIT”/ Muzikal për fëmijë tek Teatri Metropol

Grupi “Të mirësjellshmit” prezantoi për herë të parë një koncert muzikor për fëmijët në Teatrin e Metropolit. Nën ritmet e muzikës cilësore jazz, blues, swing dhe salsa fëmijët shijuan tekstet e krijuara enkas për ta, duke i mësuar ata, si të jenë të sjellshëm dhe mirënjohës në jetë

Jazz, blues, swing dhe Salsa ishin ritmet e muzikës cilësore, që shijuan fëmijët në koncertin muzikor në Teatrin e Metropolit.

Banda më e re muzikore në qytet “Të mirësjellshmit” e formuar nga disa artistë të rinj, performuan rreth një orë vetëm për fëmijët.

Fëmijë: “Është një shfaqje e mrekullueshme edhe do të vijë çdo të diel në Teatrin e Metropolit”.

Ndërsa, muzikantët e All In Band, këngëtarët, së bashku me aktorët e balerinët kënduan edhe kërcyen, këngë të cilat janë kompozuar dhe shkruar prej tyre për fëmijët. Meloditë dhe tekstet shembullore kanë si qëllim që të forcojnë më shumë dashurinë e fëmijëve për muzikën.

Amri Hasanlliu, vokalisti: “Është hera e parë në Shqipëri besoj që bëhet një shfaqje teatrore, që ka të gjithë zhanret. Të mirësjellshmit, sepse të gjithë çunat duhet që të jenë të mirësjellshëm, që mos të kenë inate edhe xhelozia me njëri-tjetri. Tekstet kanë qenë për fëmijë, edhe ne i kemi përshtatur. Mendoj se ka është një shfaqje që fëmijët duhet që të vijnë ta shohin çdo herë”.

Mirësjellja dhe mirënjohja apo komunikimi dhe bashkëveprimi me familjen, janë disa nga temat që kanë si qëllim edukimin e fëmijëve përmes muzikës dhe kërcimit, në këtë shfaqje interaktive.

Teksti dhe regjia e muzikalit dedikuar fëmijëve është realizuar nga Elona Hyseni. Muzika e realizuar nga All in Band, u këndua nga Amri Hasanlliu dhe Sara Koçi. Koreograf: Erdet Miraka. Ndërsa, balerinë Sara Koçi, Luisa Dinellari, Mario Bali, Stivi Osmanaj.