Spektakli i së martës mbrëma të “Big Brother VIP” ka pasur shumë surpriza dhe të papritura. Madje “Vëllai i Madh” u ka bërë edhe një lojë të gjithë banorëve, ku disa prej tyre e kanë kuptuar rrengun.
Mbrëmë në shtëpinë më të famshme në Shqipëri hyri vëllai binjak i Donaldit, Romeo Veshaj. Pasi bënë një takim mes tyre, ku nuk munguan as lotët, ata ndërruan veshjet dhe në vend të Donaldit, në shtëpi hyri Romeo.
Pasi ky i fundit u ul afër Beatrix, Arbana u tha që të shikonin një video që më pas ta komentonin të gjithë së bashku. E teksa Romeo bënte gjestet e të vëllait, ishte Einxhel ajo që kishte dyshimet më të mëdha dhe ndërpreu diskutimin rreth videos që po shikonin.
Pasi u kuptua që tashmë në shtëpi kishte hyrë Romeo, banorët e përqafuan dhe diskutonin se ku dallojnë binjakët. Ndërsa po përshëndetej me banorët, Romeo i pëshpëriti disa fjalë Beatrixës, të dashurës së vëllait të tij.
“Je shumë e mirë, të kam zemër”, i tha Romeo Beatrixës, e cila u duk se u ndje mjaft mirë nga fjalët e tij.
