Këngëtarja Tahliah Barnett e njohur me emrin FKA Twigs, zbuloi të mërkurën në Instagram disa lajme tronditëse në lidhje me shëndetin e saj.
Ajo ka hequr 6 tumore në mitër në dhjetor të vitit 2017.
“Pata një operacion në dhjetor dhe kam qenë shumë e frikësuar. Pavarësisht dashurisë së miqve dhe familjes, u ndjeva e vetme dhe besimi im si grua u shua”, shkruan Twigs.
Gjashtë muaj pas operacionit, këngëtarja zbulon se tashmë ka nisur sërish të ndihet vetvetja dhe të vijojë jetën.
“Unë e di se shumë gra vuajnë nga tumoret e fibroideve dhe thjesht desha të them pas përvojës sime se jeni luftëtare të mrekullueshme dhe se nuk jeni vetëm”, vijon ajo.
Fibroidet njihen si një rritje e parregullt e indeve të muskujve të mitrës. Këngëtarja zbuloi se fibroidet e saj ishin rritur sa madhësia e dy mollëve, dy kivi dhe disa luleshtrydheve. Ajo i përshkroi ato si “një tas frutash që i jepte dhimbje çdo ditë”.
