Monica Thompson tentonte prej 16 vitesh të mbeste shtatzënë, por pa fat. 46 vjeçe, ajo hoqi dorë nga ëndrra për t’u bërë nënë.
“Ishte shumë e vështirë sepse gjithë shoqet e mia kishin fëmijë, ndërsa unë jo,” tha Thompson për Inside Edition.
Kështu që, kur filloi të kishte dhimbje barku dhe të vjella në tetor të 2018-s, s’e mendoi në asnjë moment se ishte shtatzënë.
“Doktori më pyeti nëse ka ndonjë shans që të jem shtatzënë. Qesha, i thashë s’ka mundësi. Jam shumë e madhe në moshë për të bërë fëmijë. Ndoshta po kaloj menopauzën,” rikujton Monica.
Gjithashtu, Thompson kishte humbur 9 kg si rrjedhim i një ndryshimi në stilin e jetesës. “Po të më shihje, nuk të lindte dyshimi se isha shtatzënë,” tha ajo.
Analizat e gjakut zbuluan se 46-vjeçarja ishte vërtet shtatzënë dhe sipas doktorëve, ishte në javën e 30 (shtatë muajshe e gjysmë).
“Ishte shok total,” shton ajo. “Sikur më goditën në kokë.”
I fejuari i saj, Jason Ratliff – me të cilin u lidh pasi i vdiq bashkëshorti në 2016-n – ngeli gjithashtu pa fjalë. Të nesërmen, Monica u dërgua me urgjencë në spital dhe mori vesh se po lindte. Madje, ishte hapur 5cm.
Djali i saj, Jayden, u lind më 7 tetor me operacion çezarian dhe peshonte 1.5 kg. Foshnja u mbajt në inkubator deri në momentin që mund të mbijetonte jashtë tij.
“Ditën pasi linda m’u desh të telefonoja shefin e ta njoftoja se isha bërë nënë. Atij s’i besohej,” tregon Monica.
Familjarët dhe kolegët iu gjendën pranë nënës së re e i blenë pelena, rroba dhe sende të tjera.
Edhe pse shtatzënia dhe djali – i cili është 11 muajsh sot – ishin të papritura, Monica është e lumtur. Fundja, ka dashur gjithnjë të bëhet nënë. “Ndihem e plotë,” thotë ajo.