Prej kohësh, eventet në Hollywood kanë qenë sinonim i fustaneve ekstravagante, saten, tyl, funde që rrëshqasin nëpër tapetet e kuq e detaje dramatike që mezi lëvizin. Por ditët e fustaneve si zgjedhja e vetme “e duhur” për një event zyrtar duket se kanë marrë fund.
Gocat e famshme kanë një plan tjetër dhe shumë më fantastik: kostumet me vija janë rikthyer dhe po përjetojnë momentin e tyre më të fortë.
Nëse nuk je tip që pëlqen të veshësh fustane, jemi bashkë! Do të lumturohesh kur të mësosh që shumë prej yjeve më me stil të momentit po i zëvendësojnë me këtë trend të ri që është njësoj elegant, por shumë më modern.
Greta Lee është një ndër të parat që e përqafoi trendin si një yll i vërtetë. Aktorja u pa së fundmi me një kostum me vija. Ajo e stiloi setin me një këmishë neon të verdhë dhe një palë këpucë të sheshta balerina të zeza. Kombinim i guximshëm, por i freskët dhe shumë larg pritshmërive klasike për look-un e tapetit të kuq.
Ndërsa Greta e interpretoi në mënyrë më casual, të tjera vajza të famshme si Leslie Bibb shkuan për një version më të sofistikuar. Ajo zgjodhi një kostum të prerë mirë me pantallona të gjera, ndërkohë që Miley Cyrus e solli trendin në mënyrën e saj tipike, stil rockstar-i, pa shumë rregulla, por me shumë personalitet.
Drew Barrymore, ndërkohë, zgjodhi një set fund-xhaketë, të kombinuar me një kravatë të shkurtër dhe një çantë në formë qeni (po, një çantë në formë qeni!).
Nëse ke një kostum me vija në garderobë, mos e anashkalo!
Një nga gazetaret që shkruante për këtë trend tha se kishte një të tillë që nga koha e universitetit dhe tani mezi pret ta rikthejë në lojë. Dhe s’e fajësojmë, ky është momenti i tij.
Nëse do të provosh diçka ndryshe në daljen e radhës, por s’je gati të eksperimentosh shumë, ky është trendi që ia vlen të provosh. Mund ta bësh të duket formale, por edhe *qejf*. Mund ta veshësh me taka, por edhe me atlete. Me këmishë, bluzë të shkurtër apo bust. I vendos ti rregullat.
