Juliana Pasha pak muaj më parë solli një videoklip ndryshe nga sa ishim mësuar ta shihnim. “Në më je”, një këngë tepër e hareshme ra në syrin e publikut jo vetëm për muzikën por edhe për videoklipin e xhiruar në rrugë.
Juliana shfaqej në rrugët e kryeqytetit duke kënduar e me kalimin e minutave i bashkoheshin edhe disa vajza të cilat në sajë të një koreografie, fillonin të kërcenin bashkë me këngëtaren në rrugë teksa ecnin. Kjo lloj zgjedhje e këngëtares për të realizuar klipin u pëlqye shumë nga publiku.
Por mesa duket nuk qenka një gjetje nga ana e Julianës dhe stafit që ka prodhuar këtë projekt.
Në fakt po e njëjta ide koreografie dhe e klipit në tërësi është bërë një vit më parë nga këngëtarja greke Marina Satti në këngën “Mantisa”. Satti është një nga zërat e rinj më të talentuar në shtetin fqinj, një këngëtare e muzikës së lehtë e cila me kompozimin dhe tekstin e “Mantisa” dëshironte të sillte një kombinim etno- modern përmes këtij projekti.
Klipi i saj është shumë i veçantë, ajo shfaqet në rrugë duke kërcyer bashkë me balerinat shoqëruese. Të njëjtën ide e pamë edhe në videklipin e Julian Pashës por në fakt e para që e ka bërë diçka të tillë ka qenë këngëtarja greke.
Nuk është hera e parë që shikojmë artistë shqiptarë të frymëzohen nga videoklipe të të huajve. Marina është tepër e njohur në Greqi ndaj vështirë se mund të të shpëtojë një ngjashmëri e tillë.
