Aktorja e dashur për publikun, Rudina Dembacaj, prej kohësh është kthyer në një nga personazhet më të komentuar në showbiz-in shqiptar. Ajo është e martuar me Mark Frrokun si dhe ka një vajzë nga martesa me ish-burrin e saj, Aleksandër Varfaj.
Dembacaj është mjaft aktive në rrjetet sociale, ku herë pas here bën bashkëbisedime virtuale me ndjekësit e saj. Një gjë të tillë e ka bërë edhe së fundmi dhe duket se fansat kanë qenë kuriozë të dinë sa më shumë për marrëdhënien e saj me fëmijët e Mark Frrokut.
Dikush e ka pyetur Rudinën se përse nuk ka postuar foto me vajzën e vogël të bashkëshortit të saj. Por si gjithmonë nuk ka munguar përgjigjja ironike e Rudinës, po kësaj here në bashkëpunim edhe me Ertën.
“Sepse njerka më trajton keq”, ka replikuar e bija e Markut në “Instastory”-n e postuar nga Rudina.
E gjitha është marrë si një shaka nga dyshja, ku duket hapur që marrëdhënia e tyre po shkon më së miri dhe se fjala “njerkë” përmendet vetëm në kuadër të shakasë.
Më pas një tjetër e ka pyetur se pse nuk poston në rrjetet sociale djalin e Markut dhe Rudina i përgjigjet: “Se nuk do, është në sinkron me Vikin”. Aktorja tregoi më herët se nuk poston me foto apo video të vajzës pasi duhet t’i marrë leje në fillim.