Elgit Doda duket se do jetë ndër konkurrentët e fundit pjesëmarrës në kompeticionin e përvitshëm “Kënga Magjike 2019”. Artisti ka publikuar një foto të të gjithë artistëve pjesëmarrës këtë vit, me të cilët ai ka bashkëpunuar duke sjellë materiale muzikore të ndryshme dhe janë jo pak. Olsi Bylyku me “Ma kthe”, Daroi me “Për ty”, Lind Islami me “Ti m’ke rrit”, Xheisara me “Si me t’lon”, Vivjan me “Fatin kush s’e di”, janë artistët për të cilët ai ka krijuar këngë për këtë edicion të “Kënga Magjike”.
Por bashkë me skuadrën e tij, Elgiti ka bërë një ngacmim për fansat, që lë të kuptohet se do të jetë dhe vetë pjesë e kësaj gare, duke qenë i fundit që do të prezantohet me këngën e tij. “Kush mund të jetë artisti i radhës dhe i fundit për këtë vit në ‘Këngën Magjike’?”, ka shkruar Doda krah postimit më të fundit në “Instagram”. Menjëherë në llogarinë e këngëtarit kanë mbërritur komente të shumta, duke pohuar se Elgiti do të jetë pjesëmarrës këtë vit në festival.
Disa të tjerë kanë spekuluar se do të jetë grupi i “West Side Family”, megjithatë deri më tani nuk është zbuluar asnjë detaj tjetër. Me siguri e diela e kësaj jave do të rezervojë shumë surpriza për të gjithë teleshikuesit, e nëse Elgiti do të jetë pjesë, natyrisht që do të ketë të siguruara disa vota më shumë. Këngëtari mjaft i talentuar mund të jetë pjesë e një gare, e cila këtë vit do të aplikojë formulën e re, që është vota e rivalëve me votën e publikut.
