Nëse do thosha që nuk ndjek asnjëblogere në Instagram apo rrjete të tjera, sigurisht që do gënjeja. Edhe unë, si të gjitha vajzat, kam të preferuarat e mia, nga të cilat marr ngacmimin e parë; edhe pse mbështes fort mendimin, që ai që e ka stilin brenda vetes, nuk gabon kurrë. Gjithsesi, nevoja për disa duartrokitje virtuale është gjithmonë e nevojshme dhe ne na pëlqen fakti i një pëlqimi apo komenti pozitiv. Këtë herë, unë kam përzgjedhur 5 fashion blogere, të cilat gjithmonë më ngacmojnë fantazinë e më bëjnë të zbraz dollapin e disa herë edhe të marr vrapin për të bërë ndonjë blerje që siç i quaj unë, një investim i vogël.
Olivia Palermo, për të cilën edhe po të më bënin ndonjë kuiz, besoj se nga 10 përgjigje,9 do t’i kisha të sakta. Emri i saj u bë i njohur menjëherë pas një programi televiziv. E që nga ai moment, ajo cilësohet si një nga femrat më me stil në botë, duke fituar edhe çmimin si mbretëresha e streetstyle-it në vitin 2014. Dallohet për sharmin, elegancën dhe për përzgjedhjen e veshjeve duke mos gabuar asnjëherë e duke u shndërruar në ikonën e stilit glamour dhe urban, në të njëjtën kohë.
Ajo që e bën të veçantë për mua është loja e bukur që bën me stile të ndryshme. Aty ku e sheh me një veshje sportive, do të jetë aksesori, ai që bën thyerjen duke e transformuar veshjen nga sportive në elegante ose dhe e kundërta.Mendoj që Olivias i rrinë mirë të gjitha stilet. Ndoshta, çelësi i suksesit të saj është pikërisht ky.
Atlantic Pacific, kështu quhet faqja e Instagramit të Blair Eadie. Nëse i doni vërtetë ngjyrat dhe guxoni t’i mbani ato, e sigurt që Blair do të jetë e duhura për ju. Kombinime nga ato që nuk ju ka shkuar kurrë mendja, guxim në tjetërsimin e stileve e lojë me aksesorët. Stili i saj mund të quhet elegant, romantik, shumëngjyrësh dhe paksa retro, duke nxjerr në pah pjesën femërore, që e karakterizon.
Blair është nga ato vajza që e ka nisur karrierën si drejtoreshë shitjesh në një nga brendet e njohura amrikane,ToryBurch e tashmë po ndërton kompaninë e saj në lidhje me modën.
Një tipar tjetër që e dallon atë është dhe pasioni që ka për ngjyrat e thonjve : çdo veshje duhet të jetë në harmoni me ngjyrën e thonjve. Më kot nuk e kanë cilësuar si mbretëresha e ngjyrave.
Gal meets Glam – Një tjetër amerikane e quajtur Julia Hengel ose e cilësuar si vajza COLOR PINK, po aq e ëmbël, por akoma më romantike se Blair. Në faqen e saj dominon ngjyra rozë pastel, aq dhe sa shtëpinë e saj fermë në Karolinën e Jugut e ka në këto nuanca. Julia është dhe një nga blogeret që udhëton shumë nëpër botë, duke na treguar dhe vende të mrekullueshme e duke na i shoqëruar fotot e bukura me fustanet e saj elegante.
Që nga viti 2011, ajo ka kompaninë e saj të veshjeve e duke qenë një fanse e filmave të vjetër mundohet që këtë linjë ta mbaj si në stilin e saj, ashtu dhe në atë që ajo krijon për klientët.
Style Plaza – Anna Sofia. Një nga stilet që vërtetë e adhuroj është ai skandinav. Ngjyra të lehta deri në trende të papara ndonjëherë, po ku bie më shumë në sy minimizimi i gjërave. Stili skandinav do ta përkufizoja me togfjalëshin less is more.
Nga grupi i këtyrë vajzave skandinave, unë kam përzgjedhur Anën, një 30 vjeçare, e cila jeton në Helsinki dhe që dallohet për një stil të thjeshtë e të pastër. Motoja e saj është të ndërthur rregullat e stilit nordik me atë parisien, duke i dhënë më shumë rëndësi cilësisë sesa sasisë. Nëse do ta ndiqni do vini re se ajo përdor shumë triko e bluza kashmir, të cilat i kombinon me xhinse, e duke ruajtur stilin minimalist nordik.
Ranti Onayemi – Blancharde lindur në Nigeri. Profesioni i saj është arkitekte, por ajo bie në sy për një stil unik dhe fati i saj më i madh është që i shoqi është dhe fotografi i blogut të saj.Ajo që e bën të veçantë është përdorimi i vazhdueshëm i ngjyrës kamel. Stili i saj është elegant dhe shik, ku në të shumtën e rasteve bien në sy prerjet asimitrike të xhaketave apo pantallonave që ajo mban më shumë, duke e futur paksa veten në stilin mashkullor.
