Këngëtarja Beatrix Ramosaj reagoi ditën e djeshme për sulmet e vazhdueshme me të cilat është përballur pas daljes nga shtëpia e Big Brother VIP. Përmes një videoje, këngëtarja shprehej se gjatë muajve të fundit është abuzuar shumë me emrin e saj.
“Kjo video është për të gjithë personat aty jashtë ku bashkë me mua kanë vuajtur nga bullizmi. Unë zgjodha të hesht duke menduar që e gjithë kjo ishte pasojë e pjesëmarrjes në një program ku jeta private bëhet publike, por ASGJË nuk është një justifikim për Cyber Bullying.
Unë nuk e meritoj, ti nuk e meriton, prandaj mos u nënshtro! Le të jetë ky një mesazh force që ti nuk je vetëm, por jemi bashkë. Duke i dhënë dorën e duke përkrahur njëri-tjetrin ta bëjmë këtë një botë më të mire,”shkruante këngëtarja bashkangjitur videos.
Në mbështetje të saj ka dalë dhe këngëtarja Leonora Jakupi, e cila ka komentuar në postimin e saj duke thënë: “Ky është çmimi që duhet të paguajmë duke qenë njerëz publik. Të gjykojnë, të paragjykojnë, të shajnë, të përbuzin etj duke mos vënë veten asnjëherë në pozitën e tjetrit!
Bëhu vajzë e fortë ashtu siç je dhe krenare nga je, kush je dhe nga kush ke marrë gjithë këtë edukate mos e bukura Beatrix. T’i marshin të ligat ty ata që të bullizojnë”, shkruan ajo.
