Gratë e qeverisë neozelandeze vazhdojnë të përbëjnë lajm. Pas kryeministres, Jacinda Ardern, e cila është liderja e dytë e vendit që lindi fëmijë gjatë mandatit të saj, këtë herë është radha e zëvendësministres për Shanset e Barabarta, Julie Genter, e cila shkoi në maternitet për të lindur me biçikletë.
“Nuk kishte vend në makinë, plus që është edhe një mënyrë e shkëlqyer për të lindur. Ma nxiti edhe më shumë humorin”, tha ajo.
Genter i përket të Gjelbërve dhe prej vitesh promovon përdorimin e biçikletës.
Genter, 38 vjeçe, u shoqërua për në maternitet nga bashkëshorti, edhe ai me biçikletë.
Në fakt, zëvendësministrja përdori një biçikletë elektrike, ndërkohë që rruga për në maternitetin e Oklandit ishte pothuajse në zbritje.
