Ka vetëm dy javë që është ndarë nga i dashuri, por jeta vazhdon për këngëtaren Ariana Grande.
Bukuroshja duket se ka nisur një lidhje të re me komedianin e “Saturday Night Live”, Pete Davidson, shkruan “E! News”.
“Sapo ka nisur dhe është rastësore”, thotë burimi për median online.
Rastësisht ose jo, lidhja e tyre vjen menjëherë pasi Ariana dhe Pete i kanë dhënë fund dy lidhjeve të mëparshme.
Këngëtarja e hitit “No Tears Left to Cry” konfirmoi ndarjen nga reperi Mac Miller në fillim të këtij muaji. Po ashtu, Pete Davidson dhe Cazzie David i dhanë fund lidhjes pas dy vjetësh së bashku.
Burimi shpjegon se pavarësisht se Ariana dhe Mac u ndanë zyrtarisht pas pjesëmarrjes në festivalin Coachella në prill, “marrëdhënia kishte përfunduar shumë kohë më parë”.
“Ariana po e mbante Mac-in pranë vetes për një kohë të gjatë dhe nuk ishte një marrëdhënie e mirë për të”, tregon burimi. “Ajo është aty ku duhet të jetë tani dhe shumë e lumtur”.
24-vjeçarja konfirmoi ndarjen me një postim në Instagram:
“Ai është një nga miqtë e mi më të mirë në të gjithë botën dhe njeriu i preferuar në planet. E respektoj dhe e adhuroj pafundësisht dhe jam mirënjohëse që e kam në jetën time në çdo mënyrë, në çdo kohë pavarësisht se si ndryshon marrëdhënia jonë apo ajo që universi ka parashikuar për secilin prej nesh!”
