Ditën e djeshme, këngëtarja Jonida Maliqi publikoi videoklipin e këngës me të cilën do të marrë pjesë këtë vit në Eurovision, “Ktheju tokës”.
Si kënga, ashtu edhe videoklipi u prit mjaft mirë nga publiku dhe të gjithë e komplimentuan këngëtaren për klipin e realizuar, si edhe për mesazhin që po përcjell nëpërmjet këngës.
Në profilin e saj në Instagram, Jonida ka ndarë me të gjithë rrëfimin e sinqertë duke treguar se këtë këngë e ndjen shumë, pasi e ka kaluar vetë një situatë të tillë, duke i pasur larg njerëzit e saj të zemrës.
“Emigracioni nuk ka vetëm ngjyrat e vendit tim. Sot ai është një problem botëror. Unë e kam provuar në lëkurën time ç’do të thotë të mos kesh pjesëtarët e familjes nën të njëjtën shtëpi, shtet. Thirrja ime është thirrje shpirti, e të gjithëve, për të qenë bashkë, të lumtur, të rrethuar nga dashuria! Shumë prej jush më kanë shkruajtur dhe e kanë ndjerë këtë këngë në çdo notë, disa të tjerë kanë kuptuar dhimbjen edhe nga xhirimet e videoklipit. Jam e lumtur që e doni ‘Ktheju Tokës’ ashtu si unë.”- shkruan Jonida në profilin e saj.
