Sindi vendosi të largohej përfundimisht nga “Për’puthen” pa e gjetur dashurinë e jetës. Ajo pati disa histori të ndryshme në program dhe ndër më të fundit ishte ajo me Gelianin. Të dy ata u shfaqën shumë të afërt në takimin e tyre të parë, por shumë shpejt ky raport u ndërpre për shkak se Geliani u hodh në krahët e Sarës. Megjithatë, kjo e fundit e braktisi Gelianin, për t’u larguar si çift me Atdheun nga emisioni.
Pas këtij veprimi, Sindi pati një përballje me Gelianin në emision. Ajo tha se Sara e kishte përdorur Gelianin dhe hodhi thumba për këtë të fundit në disa postime në rrjete sociale. Siç duket ky reagim i ashpër i Sindit kundrejt Gelianit e ka pasur një shkak!
“Sindi më ka kërkuar të dilnim çift bashkë nga programi. Kemi qenë në prapaskenë para se të bëhej takimi dhe më tha dua të dalim bashkë çift”, tregoi Geliani.
Ai u shpreh se nuk dëshironte t’ja thoshte Sindit këtë gjë në sy, sepse nuk donte ta bënte të ndihej keq. Geliani tha se takimi me Sindin ka qenë fallco dhe një strategji nga ana e saj.
“Ka qenë fallco gjithë ai takim, ka qenë i gjithë një strategji nga ana e saj. Unë dola në takim me Sindin, sepse duke e parë në prapaskenë thashë ta njoh këtë vajzë, ndoshta më pëlqente. Nëse do kisha vazhduar takimet me Sindin ajo do më kishte përdorur”, u shpreh Geliani i bindur.
Tashmë na mbetet të shohim nëse do të ketë një reagim nga Sindi pas këtyre akuzave të forta.
