“Veç çmimit të parë, nga Kënga Magjike Rozana Radi doli edhe me burrë…” Ishte pikërisht ajo koha kur të gjithë mësuan se aktorja dhe këngëtarja e njohur ishte në një lidhje prej disa vitesh, por e kishte ruajtur gjithmonë para kureshtjes së publikut. Por nuk ia doli dot për shumë gjatë.
Tani që të gjithë e dimë që Rozana bashkëjeton me partnerin e saj, presim të mësojmë edhe hapa të tjerë në këtë marrëdhënie.
Sonte, meqenëse nuk ka më gjë për të fshehur, Rozana i rrëfeu të gjitha për partnerin e saj. Fillimisht, pas pyetjes “A ke ndonjë burrë të fshehtë që nuk do t’ua tregosh njerëzve?”, Rozi u përgjigj pa e zgjatur: “Burrë kemi. E mbajtëm të fshehtë derisa na zbuluan. Kemi dalë në publik edhe me burrin. Por nuk e kemi ende burrë, e kemi shok”, – tha ajo pa fshehur më asgjë për raportin e saj.
Po ç’plane ka për të ndryshuar statusin? “Këto plane kemi, por të shohim”, – përgjigjet ajo pas pyetjes nëse do të ketë një martesë apo një bebe së shpejti.
Por si është njohur Rozana me shokun e saj, çfarë e tërhoqi më shumë tek ai? Edhe kësaj pyetjeje këngëtarja iu përgjigj pa doreza: “Ai më bënte për të qeshur. Ai nuk ishte aktor dhe e kishte këtë talent të fshehur, që të më bënte për të qeshur” – tha ajo duke u ndalu edhe te momenti i bukur i njohjes.
“Ne jemi njohur një natë në lokal. Atij i kishte humbur çelësi i shtëpisë dhe po e kërkonte poshtë këmbëve të mia. Si përfundim e pyeta ‘çfarë kërkon këtu?’ dhe ai më tha ‘po kërkoj çelësin’”, – tha Rozana.
Pas kësaj, nuk u munduan më të gjenin çelësin, sepse “unë i dhashë çelësin e shtëpisë sime.”
