I ftuar në “Shiko Kush LUAN”, Irgen Çela u pyet lidhur me mendimin e tij për “Çiftin e shqyer” në ‘Klanifornia’, një numër humori i imituar nga “Çifti i lumtur” në ‘Portokalli’. Irgeni u shpreh se kopja nuk mund të jetë më e mirë se origjinali, duke treguar se këtë ide e kishte zhvilluar bashkë me Florin.
Duke qenë se tashmë shfaqet në një tjetër ekran, me partner në skenë Olsi Bylykun, Delinda Disha ka reaguar lidhur me deklaratën e Irgenit. Nëpërmjet një postimi në Instagram, Disha ka shkruar: “Unë jam origjinale. Ti je origjinal. Po kopja kush është? Respekte. Ritkehem në shkurt në ‘Klanifornia’ origjinale dhe më e suksesshme se nata e Vitit të Ri.”
Duket se Disha refuzon të pranojë se “Çifti i shqyer”, në fakt, është një kopje e “Çifti i lumtur”. Me vetë atë protagoniste, natyrën identike të numrit të humorit, si dhe me emrin që nuk ndërron shumë nga ai i pari, vështirë të mendosh se pretendimi i aktores qendron në këtë rast. Duke marrë parasysh, që “Çifti i lumtur” është ideuar e krijuar nga Irgen Çela dhe Florjan Binaj, për t’u zhvilluar më pas si një nga numrat identifikues të “Portokalli”, nuk do shumë për të kuptuar se ky i fundit është origjinali. Kështu, pyetja e Delindës se cila është kopja nuk duket fort me vend.
Megjithatë, zgjedhja për kopje ose jo mbetet edhe më shumë në dorë të publikut që i ka ndjekur të dyja variantet. Cili mendoni se ka të drejtë?