Prej vitesh Hueyda El Saied jeton në Luksemburg bashkë me djalin e saj dhe rikthimi në Shqipëri nuk një opsion për ta. Pavarësisht se ajo e viziton shpesh vendlindjen dhe mban kontakte me njerëzit e saj, këto gjëra nuk i heqin mallin.
Gjatë rrugës për në punë, ajo bëri një video-live me ndjekësit e saj në Instagram ku iu përgjigj disa prej pyetjeve.
Një prej ndjekësve i shkruante përse flet shqip, duke qenë se ajo ka origjinë sudaneze dhe prej kohësh nuk jeton në Shqipëri.
Hueyda El Saied tregon se shqipja është gjuha e saj, gjuha e nënës dhe ajo kurrë nuk preferon të jetë një ndër ta që me të shkuar jashtë vendit mundohen të bëjnë sikur e harrojnë shqipen.
Në një tjetër video, Hueyda emocionohet nga malli që ndjen për atdheun e saj dhe njerëzit që ka lënë këtu.
“Unë Shqipërinë nuk e mbroj, unë Shqipërinë e ndjej. Ndoshta ngaqë jam larg, më merr malli. Ndoshta ngaqë aty kam gjyshen, kam tezen, kam të afërmit dhe miqtë e mi. Më mungoni vërtetë”, shprehet ajo para se të mbyll videon.
Më pas ajo vendos të rikthehet për t’u thënë mirupafshim ndjekësve:
“E fillova ditën duke qarë falë jush. Ju puth fort”
